Ish-deputetja e Partisë Socialiste, Ledi Shamku ka komentuar videon e publikuar ditën e djeshme nga presidenti Ilir Meta, teksa ky i fundit ishte duke ecur nëpër një përrua.
Krahas videos, Meta shkruan se pas një ‘terapie me ujë bore’, i lindi një pyetje për të gjithë ata që hiqen si neutral, por që sipas tij, ia kalojnë edhe kryeministrit Rama për anshmëri. Sipas tij, këta të “paanshëm” kërkojnë dështimin e çeljes së negociatave për Shqipërinë.
Lidhur me këtë, ish-deputetja ka cituar shprehjen e gjyshes së saj “morsh molet”, ndërsa shkruan: “Në mendjen time fëminore u ngulit e mbeti një radhë veprimesh shkak-pasojë që po e formuloj si më poshtë: 1.Kush luan diçka me qëllim damtor pastaj 2. Luan mendsh dhe kush luan mendsh, më pas 3. Merr mallet.”
Postimi:
“MORSH MOLET!”
Zor se gjen një bashkësi që nam/nëm më shpesh se tironsit. E kanë nga një “të nomme” për çdo folje që ka shqipja.
Edhe gjyshja ime hynte denjësisht në këtë kompetencë (s’po i quaj mallkime se të tilla s’ishin. Përjetoheshin më fort si lojra fjalësh [scioglilingua] ekspresive).
Sa herë që trazoja a luaja nga vendi diçka që s’duhej luajtur se dëmtohej, më vinte pas qafe:
– Pse e lujte mi që ti lujtsh e morsh molet!
Siç e kuptoni, këtu ndrronin dorën si në një valle dy kuptimet e “luaj”: luaj vendit (lëviz) dhe luaj mendsh (çmendem).
Dhe në mendjen time fëminore u ngulit e mbeti një radhë veprimesh shkak-pasojë që po e formuloj si më poshtë:
1.Kush luan diçka me qëllim damtor pastaj
- Luan mendsh dhe kush luan mendsh, më pas
- Merr malet.
Ja, kjo radhë më erdh në mend sot kur mësova se dikush paska “morë molet”
