Mbyllja e televizionit “IN TV” duket se u kalua nën zë, por duket se moderatorët dhe i gjithë stafi kanë qënë të përgatitur kohë më parë. Ata kanë qenë në dijeni të këtij vendimi, se televizioni do të mbyllej.
“Trokit” ishte një prej emisioneve të përditshëm, nën moderimin e Ermal Peçit dhe Sara Gjordenit. “Blitz.al” ka kontaktuar me moderatoren, dhe ajo ka treguar të gjitha detajet në lidhje me mbylljen e televizionit, si dhe projektet e saj personale. Moderatorja ka thënë se vendimin në fjalë e dinin prej një viti, e ndërsa premtimet për vazhdimësi ishin ato që e shtynë të vazhdonte më tej.
“Përsa i përket mbylljes së “IN TV”, nuk ka ndonjë deklaratë të madhe. Ne këtë e dinim që vitin që kaloi, madje me disa detaje aty- këtu, disa mangësi. Por që gjithsesi na u premtua që nuk do ndodhte asgjë, dhe vazhduam me projektet tona. Unë këtë sezon në fakt hoqa dorë nga “Trokit”, sepse dua të vazhdoj dhe masterin dhe emisioni më merrte shumë kohë.
Duke qenë se nuk jam e çmendur dhe e apasionuar pas televizionit, nuk ja vlente më shumë se shkolla. Këtë sezon të ri do të vija me një projekt personal, që kishte të bënte me modën dhe me të ftuarit VIP. Madje dhe promoja u bë gati, një promo shumë e bukur me shumë mundim”.
Sara ka rrëfyer gjithashtu se përpara se të lajmërohej mbyllja e televizionit, kishte refuzuar disa oferta nga televizionet e mëdha, për të vazhduar sërish në “IN TV”, për shkak se ishte këshilluar të vazhdonte dhe një sezon në një televizion të vogël, përpara se të përballej me konkurrencën e ekraneve të mëdha.
“Ndërkohë projekte të tjera kam disa biznese personale që drejtoj, siç janë kompania e stampimit të bluzave dhe kompania e produkteve kozmetike që i tregtojmë në dyqanet shqiptare. Kam dhe shkollën, kështu që jam e zënë gjatë gjithë kohës. Projektet në “IN TV” ishin thjesht një pjesë, një element mes shumë gjërash që bëja”.
Por a do ta lërë përfundimisht televizionin?
“Për sezonin tjetër mund të ridiskutoj dhe një herë një ofertë me një televizion të madh këtu në Shqipëri. Por bëhet fjalë nga janari, tani jo”, është shprehur ajo për “Blitz.al”.
