Mbytja e nëndetëses bërthamore sovjetike K-129 në marsin e vitit 1968, mbetet një nga misteret më të mëdha të Luftës së Ftohtë. Nëndetësja kishte në bord 98 marinarë, drejtohej nga një kapiten me shumë eksperiencë, dhe kishte në bord 3 raketa bërthamore.
Ajo patrullonte shpesh brigjet perëndimore të SHBA-së dhe bazat amerikane në Paqësor, e gatshme të lëshonte raketat e saj në rastin e shpërthimit të luftës mes dy superfuqive. E nisur nga baza e saj në Kamçatka më 24 shkurt, K-129 humbi kontaktet më 7 mars.
Flota sovjetike, angazhoi të gjithë arsenalin e saj në një kërkim disamujor, pa mundur të gjejë ndonjë gjurmë. Aty ku dështuan rusët, patën sukses amerikanët. Pasi vëzhgoi në distancë operacionin e kërkimit të sovjetikëve, marina amerikane ia doli të lokalizojë më 20 gusht nëndetësen sovjetike që ishte mbytur, dhe gjendej në fund të oqeanit në një thellësi 4900 metra.
Përmes një operacioni tepër sekret të koordinuar nga CIA, marina e SHBA-së ia doli të nxjerrë në sipërfaqe një pjesë të nëndetëses. Rusët besojnë se amerikanët arritën të vjedhin shumicën e sekreteve të pajisjeve, pretendim që u mohua nga Uashingtoni. Pati shumë hipoteza për mbytjen e nëndetëses, nga ajo e një defekti teknik, shpërthimi, dhe deri tek përplasja me një nëndetëse amerikane.
