Miratohet projektligji për trajtim financiar të minatorëve, naftëtarëve dhe metalurgëve. Projektligji u miratua ditën e sotme në Kuvend me 77 vota pro, 12 kundër dhe 9 abstenim.
Ministrja e Financave dhe Ekonomisë, Anila Denaj u shpreh pak më herët se kategoritë që përfitojnë nga ky projekligj janë: 13300 minatorë, 7600 naftëtarë dhe 2500 metalurgë.
“Nëse një minator i nëntokës, që është profesioni më i vështirë, paguan 1 lek kontribut, do të marrë në pension 3.6 lekë, pra 360%. Por pyetja fare fare naïve, dhe e drejtë, është nga financohet diferenca? Nëse diferenca është kaq e madhe, nga financohet kjo diferencë? Financohet nga buxheti i shtetit, pra drejtësia sociale e vendosur në themel të këtij raporti. Ta dinë qytetarët, do t’I paguajmë nga taksat tona dhe mirë do bëjmë, që të paguajmë plus shpërblim në pension për këto tre kategori. E njëjta gjë vlen edhe për naftëtarët, për 1 lek kontribut do të marrin 1.57 lekë në pension, pra 157%. E njëjta gjë vlen edhe për metalurgët, që shkon në 280%”, u shpreh Denaj.
