Ditën e sotme është miratuar në Këshillin e Ministrave drafti që synon të formalizojë dhe rregullojë mediat online, i njohur ndryshe si “paketa anti-shpifje”.
Lajmin në fjalë e ka bërë me dije ministrja e Drejtësisë Etilda Gjonaj e cila theksoi përgjatë një deklarate mediatike se kjo paketë nuk e cenon fjalën e lirë.
Nga ana tjetër, opozita e ka quajtur këtë paketë si tentativë të qeverisë Rama për të instaluar censurën në mediat online. Vlen për t’u theksuar se sipas kësaj pakete, portalet online duhet të regjistrohen si person juridik ose fizik të tatueshëm në regjistrin e ofruesve të publikimeve elektronike. “Çdo portal është i detyruar që të sigurojë që publikimet të shfaqen në një mënyrë të vërtetë, të paanshme dhe objektive. Portalet duhet të marrin masa për mospërdorimin e publikimeve për qëllime kriminale. Gjithashtu, publikimet nuk duhet të cenojnë dinjitetin dhe të drejtat themelore të njeriut. Në rast të shkeljes së ndonjë nga pikave që parashikon kjo paketë, pronarët e portaleve do të dënohen me gjobë deri në mbylljen e portalit”.
