OBSH ka përgëzuar me anë të një letre Qeverinë Shqiptare, për hapat e ndërmarrë për ndalimin e duhanpirjes dhe mbrojtjen e shëndetit, nga të gjitha llojet e produkteve të duhanit.
Drejtuesi i zyrës së OBSH-së në Shqipëri, Raúl Gonzáles i ka dërguar një letër ministres së Shëndetësisë dhe Mbrojtjes Sociale, Ogerta Manastirlliu, për ta përgëzuar për amendamentet e miratuara. Kujtojmë që Manastirlliu, në seancën e fundit të Kuvendit të Shqipërisë, ditën e enjte, propozoi ligjin “Për Mbrojtjen e Shëndetit nga Produktet e Duhanit”.
“OBSH përgëzon qeverinë e Shqipërisë për hapat e ndërmarrë, për të çuar përpara implementimin e Konventës Kuadër të Kontrollit të Duhanit, duke vendosur si prioritet shëndetin e qytetarëve shqiptarë, mbi interesat e tjera”, thuhet në letrën drejtuar ministres Manastirliu.
Edhe Zyra Rajonale e OBSH-së për Evropën dhe Zyra e OBSH-së në Shqipëri ka mbështetur qeverinë shqiptare për hapat e ndërmarrë.
“Ju mbështesin fort në eleminimin e dëmeve shëndetësore, sociale, ekonomike dhe mjedisore, që duhani shkakton mbi njerëzit dhe shoqëritë. Ju siguroj se OBSH do të jetë gjithmonë në krahun e interesit të publikut, për implementimin e efektshëm të të gjithë masave ligjore që vendosin shëndetin para gjithçkaje”, thuhet në letër.
