Ministrja për Integrime Eropiane në Serbi, Jadranka Joksimoviq, deklaroi se Serbia pret që deri në fund të vitit të hapen edhe tre kapituj të tjerë në procesin për anëtarësim në BE.
Ajo theksoi se është naive të mendohet se Serbia do të kushtëzohet për pranim në BE në rast se njeh pavarësinë e Kosovës, edhe pse e pranoi se shumë shtete e kanë njohur Kosovën si të pavarur.
“Presim që brenda vitit të hapim edhe tre kapituj tjerë, për të cilat jemi plotësisht të gatshëm.
Sa i përket Kosovës, ky është një kapitull i veçantë, ku monitorohet nga Brukseli për rezultatet e marrëveshjes me Prishtinën zyrtare. Kjo është një çështje e krijuar nga rrethanat politike, që nuk është aspak e lehtë, prandaj ne luftojmë që t’i mbrojmë interesat tona atje.
Por, duhet pranuar se Kosovën e pavarur e kanë pranuar shumë shtete”, tha Jaksimoviq për mediat serbe.
Ajo shtoi se është me rëndësi ftesa e kryetarit të shtetit, Aleksander Vuçiç, për dialog të brendshëm për Kosovën, i cili edhe si kryeministër i vendit ka marrë pjesë në bisedime me Kosovën për gjetjen e një zgjidhjeje të pranueshme e të gjithanshme.
