Etilda Gjonaj, ministre e Drejtësisë ka nisur inspektimet në burgjet shqiptare, ku prej kohësh siguria është e ulët dhe nuk mungojnë rastet ku punonjësit e burgjeve për një shumë parash, lejojnë që në qelitë e të burgosurve të futen celularë, mjete të ndryshe apo edhe lëndë narkotike.
Ministrja e Drejtësisë ka qenë në Peqin ku ka inspektuar institucionin ku vuajnë dënimin me qindra të burgosur dhe tha se “duhet një reformë urgjente, pasi rastet e korrupsionit në burgje janë të shumta”.
Gjithashtu ministrja tregoi se penalizmi i punonjësve të burgjeve ka filluar dhe se vetëm në 2 muajt e fundit janë evidentuar dhe penalizuar 20 punonjës.
Etilda Gjonaj nga burgu i Peqinit ka bërë një premtim, duke thënë se shumë shpejt në burgjet shqiptare do të minimizohet korrupsioni dhe do të rikthehet siguria maksimale.
“Kemi ndërmarrë një reformë rrënjësore në burgje dhe nuk do të ndalemi deri në pastrimin e të gjitha rrënjëve të korrupsionit që janë shtrirë ndër vite e vite të tëra bashkëjetese të institucioneve”. Kështu është shprehur ministrja e Drejtësisë, Etilda Gjonaj gjatë një inspektimi që ka zhvilluar në burgun e Peqinit.
Gjatë inspektimit në burgun e Peqinit ministrja Gjonaj kontrolloi nga afër ambientet e burgut dhe dha porosi të veçanta për rregullimin e disa elementëve të tyre. Mësohet se ajo ka vizituar disa qeli ku ndodhen të burgosur, mes te cilëve edhe atë të kreut te Bandës se Lushnjës, Aldo Bares dhe të Enver Dondollakut.
Mësohet se ministrja gjithashtu u takua me të burgosur e familjarë të tyre, të cilët i kanë shprehur ministres problematika të ndryshme, pjesa më e madhe e të cilave lidheshin më sistemin gjyqësor.
Gjonaj ka theksuar se pastërtia dhe integriteti moral i punonjësve në burgje është objektivi kryesor i reformës, jo si qëllim në vetvete, por si rruga e vetme për forcimin e sigurisë në burgje dhe një shërbim sa më profesional në institucionet e vuajtjes së dënimit.
Gjatë verifikimit të bërë nga Ministria e Drejtësisë ka rezultuar se rreth 100 punonjës janë me rekorde kriminale, çka do të thotë se ata automatikisht nuk duhet të ishin bere pjese e sistemit.
Nga ana tjetër rreth 70 punonjës nuk ju përputhet arsimi me pozcionin e punës.
Ministrja e Drejtësisë u shpreh se nuk do të ketë asnjë tolerim në procesin e verifikimit të pastërtisë morale të punonjësve. Të gjithë ata që nuk plotësojnë kriteret do të largohen.
Ministrja Gjonaj është ndalur edhe në sistemin e ri të rekrutimit, me qellim pasjen e një trupe jo te emëruar politikisht dhe sa me profesionale.
Për këtë qëllim në bashkëpunim me Akademinë e Sigurisë do të organizohen testime profesionale për rekrutimin dhe më pas kandidatët e përzgjedhur do t’i nënshtrohen një kursi trajnimi, lidhur me detyrat funksionale të punës në burgje.
