Ministria ruse e Mbrojtjes tha të shtunën se nisi sulme me raketa gjatë natës kundër objektivave në Ukrainë – por pretendoi se kishte në shënjestër ekskluzivisht infrastrukturën ushtarake, pasi u shfaqën video të një ndërtese të lartë rezidenciale pranë Kievit që u godit nga një raketë.
“Gjatë natës, Forcat e Armatosura të Federatës Ruse filluan një sulm me armë precize me rreze të gjatë duke përdorur raketa lundrimi të lëshuara nga ajri dhe deti, kundër objekteve të infrastrukturës ushtarake ukrainase”, tha gjeneralmajor Igor Konashenkov në një deklaratë video.
“Theksoj edhe një herë se zjarri është drejtuar vetëm në objektet e infrastrukturës ushtarake të Forcave të Armatosura të Ukrainës, duke përjashtuar dëmtimet në infrastrukturën rezidenciale dhe sociale”.
Imazhet e mëngjesit të së shtunës treguan dëmtime të rënda në pjesën e jashtme të një ndërtese apartamentesh në Kievin perëndimor, me muret e jashtme të shpërthyera tërësisht për disa njësi apartamentesh. Punonjësit e urgjencës ndodhen në vendngjarje, duke ndihmuar në evakuimin e banorëve. Numri i viktimave nuk është ende e qartë.
Burimi i lajmit: CNN. Përshtatur nga Tirana Today
