Ministri i Jashtëm i Turqisë, Mevlüt Çavuşoğlu, ka deklaruar se anija sizmike turke është kthyer për mirëmbajtje, dhe se nuk ka ndryshim të planeve kërkimore.
Ai ka sqaruar zërat dashakeqë se anija eksploruese sizmike e vendit, që operon në Mesdheun Lindor, është kthyer për t’u rimbushur me furnizimet dhe për mirëmbajtje.
Mevlüt Çavuşoğlu i ka vënë vulën kësaj çështje, duke konfirmuar se kthimi i anijes Oruç Reis nuk do të thotë ndryshim në politikën turke të kërkimeve në rajon.
Çavuşoğlu tha se Turqia mund të ketë bisedime të drejtpërdrejta me Greqinë, për të zgjidhur mosmarrëveshjet në Mesdheun Lindor. Por nëse Athina këmbëngul në vendosjen e parakushteve, atëherë edhe Ankaraja do t’ia kthehet me të njëjtën monedhë.
