Një moment mjaft të sikletshëm ka kaluar ministri i Tregtisë dhe Industrisë në Kosovë, Bajram Hasani në Bruksel.
Ai mori fjalën për të promovuar pikërisht turizmin e Kosovës para ministrave të vendeve të BE-së, por ajo çfarë u mbajt mend nga fjala e tij ishte pikërisht fakti se nuk dinte anglisht.
Teksa nis fjalën në shqip, kërkohet që të përkthehet në anglisht për t’u kuptuar nga të pranishmit, por konstatohet se nuk ka përkthyes.
Ministrit Hasani i kërkohet të vazhdojë fjalimin e tij në gjuhën angleze ose ndonjë tjetër gjuhë zyrtare, por në këtë moment ai bllokohet dhe ngec.
Në pamundësi për të vazhduar fjalimin e tij në gjuhën angleze, Hasani vazhdon në shqip derisa kolegu pranë tij merr përsipër të përkthejë në anglisht për të kuptuar të tjerët.
Videoja e sikletshme është publikuar nga Admir Istrefi në Facebook, i cili shkruan:
“Me këtë video të “përfaqësimit dinjitoz” të Kosovës në takimin e Këshillit të Unionit Europian, ju uroj 10 vjetorin e Shtetndërtimit. Kjo tregon më së miri se si ne vazhdojmë me i promovu të paditurit edhe me na përfaqësu në mënyre amatore në instanca më të larta diplomatike. Uroj që kurrë mos të kemi kësi lloj përvjetori jubilar me këto Qeveri qe me u krenu vetëm me të arriturat e sportisteve dhe artisteve, që ja kanë dalur me forca vetanake”.
