Ministri i jashtëm i Greqisë, Nikos Kotzias deklaroi sot se nuk ekziston çështja Çame. Kotzias, sqaron opinionin publik grek se në negociatat me ministrin e jashtëm Ditmir Bushati nuk është diskutuar për çështjen Çame.
Në përgjigjen zyrtare që i ka kthyer sot opozitës greke rreth bisedimeve shqiptaro-greke, Kotzias deklaron se gjatë bisedimeve me palën shqiptare nuk është negociuar për çështjen Çame. Ai është shprehur se bisedimet janë fokusuar tek çështjet e mbetura pezull dhe mosmarrëveshjet në 70 vitet e fundit.
“Nuk ekziston çështja çame dhe nuk ishte temë e diskutimit mes dy palëve. Bisedimet me ministrin Bushati u përqendruan në çështje të pazgjidhura në 70 vitet e fundit dhe kemi përparuar për gjetje të zgjidhjeve të qëndrueshme. Ka përmirësim në marrëdhëniet greko-shqiptare nga dialogu i vazhdueshëm”- ka thënë Kotzias, njofton gazeta greke ‘Kathimerini’.
Bushati dhe Kotzias kanë zhvilluar dy raunde bisedimesh, në Kretë në nëntor 2017 dhe në qytetin e Korçës javën e kaluar. 
