Ministrja e Jashtme e Kosovës, Meliza Haradinaj-Stublla, ka rënë pre e një sulmi kibernetik. Kryediplomates kosovare i është hakuar llogaria e saj në Facebook. Këtë rast, ministrja e ka paraqitur në Policinë e Kosovës, ku pastaj është njoftuar edhe njësia e Krimeve Kibernetike dhe prokurori i shtetit.
“Prishtinë 12.11.2020 – 14:00. Ankuesja f/k ka raportuar se nuk ka qasje në llogarinë e Facebookut, llogaria është hakuar. Në lidhje me rastin është njoftuar njësia e Krimeve Kibernetike dhe prokurori i shtetit”, thuhet në raportin 24-orësh të Policisë së Kosovës.
Sipas MPJD-së, ky sulm kibernetik ndaj llogarisë së saj vjen pas reagimit që kishte ndaj deklaratave të Aleksandër Vuçiçit, i cili kërcënoi hapur me luftë të re në Ballkan të gjitha shtetet fqinje të rreshtuara me NATO-n, duke thënë se Serbia duhet të vazhdojë forcimin ushtarak.
