Pas prangosjes së një të riu nga blutë e Lezhës, pasi posedonte në mjetin e tij mina me telekomandë, mediat vërshuan të bënin me dije se bëhet fjalë për vëllanë e moderatores Alketa Vejsiu. “Telekomanda” u quajt operacioni i Drejtorisë së Policisë së Lezhës, që vuri në pranga 29-vjeçarin Endrit Vejsiu, vëllanë e Alketa Vejsiut.
Në aksin rrugor Milot – Lezhë, në mjetin e tij tip “Opel”, në një gomë rezervë në bagazh, u gjetën të fshehura 4 mina me telekomandë.
“Strukturat e Drejtorisë Vendore të Policisë Lezhë, në vijim të punës për parandalimin dhe goditje e veprimtarisë kriminale, gjatë orëve të natës, kanë finalizuar operacionin e koduar “Telekomanda”.
Si rezultat, u bë i mundur kapja e shtetasit Endrit Vejsiu, 29-vjeç, nga Tirana, pasi në aksin rrugor Milot – Lezhë, në kryqëzimin e Shënkollit, në mjetin e tij tip “Opel”, në një gomë rezervë në bagazh, u gjetën të fshehura 4 mina me telekomandë.
Ato ishin të paketuara me nga dy cilindra materiali të ngurtë, të mbështjellë me natriban, të dyshuara lëndë plasëse e llojit TNT. Gjithashtu u gjetën edhe rreth 3 kilogramë lëndë e dyshuar narkotike kanabis sativa, e paketuar gati për shitje”.
Arrestimi i Vejsiut u bë për veprat penale “Prodhim dhe shitje e lëndëve narkotike”, dhe “Trafikim i lëndëve plasëse”.
