Të hënën do të ketë një përballje mjaft interesante në Superligën Shqiptare, ku kampionët e Kukësit do të presin Skënderbeun. Një kryendeshje e kampionatit pasi janë edhe dy ekipet më në formë të momentit. Skënderbeu vjen nga një javë e lodhshme, një ndeshje në fundjavë me Partizanin e më pas me Young Boys në Europa League. Kukësi nga ana tjetër Ka zhvilluar dy ndeshje, atë me Laçin dhe një ndeshje në kupën e Shqipërisë me Egnatian. Të dy ekipet e do të kenë mungesa në këtë supersfidë.
Verilindorët kampionë në fuqi ndajnë kreun me skuadrën korçare, me nga 7 pikë, ndërkohë që do të përpiqen të shfrytëzojnë edhe lodhjen e ekipit të Skënderbeut, që aktualisht luan edhe në fazën e grupeve të Europa League.
Mlladen Milinkoviç, trajner i Kukësit, tha: “Vërtet është shumë i gjatë kampionati, por kjo është një ndeshje si një finale. Sigurisht, Skënderbeu mund të ndjejë lodhje nga ndeshja në Europa League, por nuk besoj se do të ndikojë tek kjo ndeshje e kampionatit, pasi ka shumë lojtarë. Megjithatë, ne na duhet fitorja dhe vetëm ajo na kënaq si ne dhe tifozët që do të rikthehen këtë ndeshje”.
Ndërkohë, ende pa kaluar entuziazmi i pikës së parë të marrë në fazën e grupeve në Europa League, Ilir Daja në prononcimin e tij për Top Channel, tregoi se nuk ka kohë për të festuar.
“Ka qenë një javë intensive, pasi brenda saj na u desh të luanim me Partizanin, në Europa League dhe ditën e hënë me Kukësin, që është një ndeshje shumë e rëndësishme për ne. Për këtë arsye do t’i kthehemi punës që nesër sepse dihet që objektivi ynë sezonal është titulli kampion dhe në Kukës na pret një ndeshje e vështirë”, deklaroi Daja.
Sa i përket gjendjes së skuadrës së Kukësit, trajneri Milinkoviç thekson rikthimin në formacion të portierit Koliçi dhe Hallaçit dhe lë në dyshim Bakajn dhe Shametin, të cilët janë të dëmtuar.
Ndërkohë, për Skënderbeun mungon Gavazaj i dëmtuar në ndeshjen me Young Boys, ndërkohë që do të rikthehet me shumë mundësi Radas dhe Osmani.
Ndeshja mes Kukësit dhe Skënderbeut do të luhet ditën e hënë në “Zeqir Ymeri”.
