Milani është rikthyer tek fitorja dhe vazhdon ecurinë pozitive me gjashtë javë pa humbje. Kuqezinjtë mposhtën SPAL-in në javën e 24 të Serie A, me një fitore të thellë 4-0 në transfertë. Pjesa e parë u dominua nga Rossonerët, të cilët e nisën mirë takimin dhe gjetën golin e parë që në minutën e dytë, ishte Patrick Cutrone, i cili shënoi pas një rrëmuje në zonë.
Milani vazhdoi me aksione dhe raste të mira edhe në vazhdim, por pa pasur fat të ngrit epërsinë dhe shkuan në pushim me rezultat minimal. Në pjesën e dytë, skuadra e Gattusos arriti ta konfirmojë fitoren edhe me tre gola tjerë, ku i pari në këtë pjesë erdhi në minutën e 65-të me shënues përsëri Cutronen.
Goli i tretë vjen në minutën e 73-të të ndeshjes, ishte mesfushori Lucas Biglia që shënon një gol mjaft të bukur pas një gabimi të lojtarëve të SPAL. Ndërsa për 4-0 shënoi Fabio Borini në minutën e 90-të duke vulosur fitoren dhe rezultatin përfundimtar të takimit.
Pas kësaj fitore, Milani ngjitet në vendin e shtatë me 38 pikë, ndërsa SPAL-i mbetet në vendin e 18-të me 17 pikë të mbledhura. Në ndeshjen e radhës, Rossonerët presin në shtëpi Sampdorian, ndërsa vendasit udhëtojnë drejt Napolit.
