Milani është rikthyer tek fitorja dhe këtë e ka bërë në mënyrën më të mirë, duke i shënuar katër gola Sasuolos në transfertë dhe pëson vetëm një. Pas tre barazimesh radhazi kuqezinjtë e Gatussos kthehen tek fitorja që u jep frymëmarrje. Edhe pse pa një sulmues pykë në këtë ndeshje, Milani ia doli mjaft mirë të organizojë fazën e sulmit.
Pas disa rastesh të pastra të shpërdoruara nga të dyja skuadrat është Franck Kessie ai që shënon një gol mjaft të bukur në fundin e pjesës së parë.
Ndërkohë, në minutën e pestë të pjesës së dytë, me një goditje të bukur nga jashtë zone, spanjolli Suso i çoi shifrat në 0-2 për Milan. Suso, në ndeshjen e tij numër 100 në Serie A, u kthye te goli pas 1728 minutash “agjërim”.
Kur u mbush një orë lojë, një tjetër spanjoll, Samu Castillejo, realizoi golin e tretë për miqtë. Për 23-vjeçarin, që luajti si qendërsulmues, ky ishte goli i parë në Serie A.
Sassuolo u përpoq të futej në lojë me golin e serbit Filip Djuricic, i cili kishte vetëm dhjetë minuta në fushën e lojës, por vetëm kaq, sepse ekipi që kishte qene surpriza e këtij fillim kampionati në Itali, nuk mundi të prishë festën e Milan.
Skuadra e Gattuso, që ka luajtur një ndeshje më pak se të tjerat, është në vendin e dhjetë me nëntë pikë. Sassuolo, që ka tre pikë më shumë renditet e pesta. Suksesi ndaj Sassuolo shërben si frymëmarrje edhe për trajnerin e kuqezinjve Gennaro Gattuso pasi po shfaqej gjithmonë e më shumë “fantazma” e Antonio Conte si pasardhësi i tij.
Në javën e ardhshme, Milan do të ndeshet me Chievo në “San Siro”. Kurioz është fakti se Milan nuk shënonte tre gola nga jashtë zone, pikërisht që nga tetori i vitit 2016 kundër Chievo.
