Shqiptarët janë bërë bashkë kundër shtrenjtimit të çmimeve. Protesta po zhvillohet aktualisht në Tiranë por edhe në rrethe, në ditën e katërt të saj. Aktori i njohur Florian Binaj, ka apeluar ndaj të gjitha figurave publike, që të bashkohen në këtë protestë. Ai u shpreh se nuk është këtu vetëm për vete, por për të gjithë ata që nuk munden ndërsa vendin në krye të protestës ia liroi kolegut të tij, Irgen Çela i njohur si Xhoda.
“Ky është flamuri më i bukur në botë. Ka që vite e vite që vidhet. Ne jemi sot këtu për njëri- tjetrin dhe ata që nuk janë. Jemi për ata motra e vëllezër që kanë lënë vendin dhe kanë ikur jashtë vendit.
Është hera e parë që nuk kuptohet ku fillon sheshi Skëndërbej dhe ku mbaron sheshi Nënë Tereza. Ne jemi sot këtu jo vetëm për fëmijët tanë. I faleminderit atyre prindërve që i kanë marrë fëmijët sot. Faleminderit çdo qytetari që ka ardhur nga çdo skaj i Shqipërisë.
Jam kritikuar shumë se kam dalë të protestoj. Do doja shumë që ashtu si u bashkua Marin Mema të na bashkohen shumë figura publike. Unë sot nuk jam vetëm. Një tjetër artist i është bashkuar kësaj proteste. Dhe do i liroj pak vendin se kam ardhur me babin”, tha Florian Binaj.
Një thirrje për pjesëmarrje në protestë e pati edhe aktori Irgen Çela. “A më shihni të gjithë të paktën? Jam pjesë e kësaj proteste, se kjo është e popullit dhe jo e partive politike. Ashtu siç tha kolegu im, unë i ftoj personazhet publik, se përpara se të jemi VIP-a jemi qytetarë.
Jam për të gjithë ata pensionistë, që kanë frikë të ndezin kaloriferin se u vjen fatura e lartë e energjisë. Ata që kanë frikë të blejnë ushqime në supermarket. Gjyshërit tanë që kanë punuar gjithë jetën dhe nuk kanë marrë asgjë. Jam shumë krenar që jam këtu me juve”, tha ai.
Mijëra qytetarë janë mbledhur në Tiranë kundër rritjes së çmimit të karburanteve dhe ushqimeve gjatë muajve të fundit. Protestuesit kanë vijuar nga sheshi Skënderbej në drejtim të godinës së Kryeministrisë.
Qytetarët kërkojnë nga qeveria marrjen e masave të menjëhershme për stabilizimin e çmimeve dhe shmangien e abuzimeve në treg. Krahas kësaj, qytetarët kërkojnë edhe lirimin e dhjetra protestuesve të ndaluar gjatë tre ditëve të mëparshme.
