Kreu i qeverisë Edi Rama do të jetë sot në orën 12:00, i pranishëm në Komisionin Hetimor për Inceneratorët, për të dëshmuar mbi aferën e inceneratorëve. Lajmin në fjalë e ka konfirmuar vetë kryeministri Rama, teksa shprehet më tej se mezi pret që të shkojë në Komisionin Hetimor, për të dëshmuar para deputetëve të PS e PD.
Ja se çfarë shkruan Rama:
MIRËMËNGJES
dhe me gangrenat e fushëkodërplehrave të Elbasanit, Fierit, Durrësit e Tiranës, të cilat i shëruam përfundimisht, përmes impianteve moderne të përpunimit të mbetjeve, ju uroj një ditë të mbarë
*SOT NË 12:00 DO TË DËSHMOJ PARA KOMISIONIT HETIMOR PARLAMENTAR – LIVE FB
Mezi po pres
Koka dhe Bllako refuzojnë dëshminë në Komisionin Hetimor
Ish-ministri i Mjedisit Lefter Koka dhe ish-Sekretari i Përgjithshëm i kësaj ministrie, Alqi Bllako, nuk kanë pranuar të dëshmojnë në Komisionin Hetimor për inceneratorët. Mësohet se avokatët e Kokës kanë refuzuar praninë e tij në Komision.
Ndërkohë në mbrëmje u paraqit deputeti Alqi Bllako. Ai u shpreh para Komisionit se ka dhënë një dëshmi për gati 5 orë në SPAK, dhe nuk mund të dëshmojë në Komision sepse deklarimet në Prokurori janë sekret hetimor. “Unë kam dhënë një dëshmi të plotë shteruese për gati 5 orë përpara përfaqësuesve të SPAK. Gjatë dëshmisë, dhe në fund, jam vënë në dijeni se këto janë sekrete hetimore. Ndaj në saj edhe të praktikës ligjore të vendosur nga ky Komision, mendoj se jam në kushtet e pamundshmërisë për të dëshmuar lidhur me këto procedura, pasi çdo gjë që di e kam dëshmuar përpara SPAK”, tha ai duke u larguar nga mbledhja.
