Presidenti i zgjedhur, Ilir Meta, ka përshëndetur ftesën e Presidentit, ende në detyrë, Nishani, për dialog, në funksion të zgjidhjes së krizës së rëndë politike që ka mbërthyer Shqipërinë.
Meta theksoi se duhet bërë gjithçka për të mundësuar pjesëmarrjen e opozitës në zgjedhje. Meta ka qenë gjithmonë në kërkim të dialogut me opozitën, dhe ka ofruar shumë rrugëzgjidhje që Shqipëria të dalë nga situata e ngërçit politik.
Deklarata e Metës u bë gjatë takimit me kryetarin e grupit parlamentar të SPO austriake, Andreas Schieder. Meta dhe Schieder biseduan dhe për situatën politike në Shqipëri. Andreas Schieder uroi Metën për zgjedhjen në postin e Presidentit të Republikës, gjithashtu tha se Austria mbështet stabilitetin politik të Shqipërisë dhe progresin e reformave. Në takim u ra dakord se duhet forcuar roli stabilizues i Shqipërisë në rajon.
