Presidenti Ilir Meta priti sot në një takim kryetarin e emëruar të Komunës së Preshevës, njëkohësisht kreun e partisë “Alternativa për Ndryshim”, Shqipërim Arifi.
Meta theksoi rëndësinë që ka bashkëpunimi në mes të faktorit politik shqiptar në Preshevë dhe në të gjithë Luginën, për realizimin e nevojave dhe interesave politike, ekonomike dhe të gjitha fushave të jetës për shqiptaret e Luginës.
Po ashtu, presidenti theksoi rëndësinë e bashkëpunimit të bashkive të ndryshme të Shqipërisë me Komunën e Preshevës për realizimin e projekteve të përbashkëta kulturore, arsimore, sportive, si dhe me zhvillimin ekonomik të Preshevës.
Në këtë takim, Meta ndau me Arifin interesimin e tij ndaj problemeve dhe kërkesave për zgjidhje, që ndikojnë në përmirësimin e jetës së qytetarëve të Komunës së Preshevës dhe shqiptarëve të Luginës në përgjithësi, si dhe theksoi rëndësinë e integrimit të shqiptarëve në të gjitha nivelet e administratës vendore dhe qendrore.
