Delegacioni i Komisionit të Venecias është pritur sot nga presidenti Ilir Meta. Në fokus të takimit ka qenë paraqitja e fakteve dhe provave që sipas presidentit faktojnë shkeljet në emërime për Gjykatën Kushtetuese.
Gjatë takimit, Meta shprehu mirënjohje për Komisionin e Venecias, duke sjellë dhe momente historike ku ndërhyrja dhe opinioni i Venecias ka ndihmuar në kalimin e ngërçeve në Shqipëri.
“Bëmë një kushtetutë të mrekullueshme me Komisionin e Venecias dhe që u votua referendum nga populli shqiptar në ‘98. Profesor Caco në atë kohë, Buchichio kanë bërë një punë të mrekullueshme. Por që atëherë ne harruam çfarë ndodhi dhe herë pas here i kemi çmontuar mekanizmat ‘check&balance’ të Kushtetutës sonë.
Komisioni i Venecias ka bërë më të mirën e tij. Ashtu siç e bëri edhe për reformën që ne miratuam në kushtetutë për drejtësinë, e cila u votua me 140 vota nga 140 deputetë siç nuk ka ndodhur ndonjëherë. Dhe unë isha kryetar i parlamentit në atë kohë dhe jam krenar për atë arritje se pata mundësi për ta imponuar atë konseneus vetëm duke përdorur rekomandimet e komisionit të Venecias”, deklaroi Meta.
