Pas daljes së sotme për mediat të Etilda Gjonajt, ka reaguar edhe presidenti Ilir Meta. Me tone të larta ai tha mbrëmjen e sotme në emisionin “Opinion” se presidenti nuk merret me një falsifikatore. Kreu i Shtetit akuzoi edhe njëherë ministren se ka falsifikuar, duke i marrë kompetencën atij dhe Këshillit të Emërimeve në Drejtësi.
“Si mund të merrem unë me një falsifikatore? Gjuha ime ka qenë shumë korrekte, ajo më ngatërron mua me gjuhën e Monikës, ato ta zgjidhin bashkë të dyja. Zonja të shkojë e të tregojë shokët tek SPAK. Nuk ka Shqipëria institucion më të rëndësishëm se Gjykata Kushtetuese dhe Gjykata me këto filma që bën Dvorani dhe kjo zonja, e bën këtë Kushtetutë një letër pa vlerë.
Presidenti i ka kapur në flagrancë, jo për meritë të presidentit, se presidenti i ka paralajmëruar që prej dy vitesh. I kam thënë që te Gjykata Kushtetuese është vija e kuqe. Ky është krimi më i rëndë dhe më i thjeshtë për t’u hetuar se janë 3 letra dhe 8 veta për t’u pyetur. Ajo ka falsifikuar, më ka rrëmbyer mua kompetencën, ja ka rrëmbyer kompetencën KED. Nuk merrem unë me reagimet e saj. Ministren e ka “vrarë” që e ka porositur për të bërë këtë akt kriminal. E ka porositur ai që nuk e lejon të japë dorëheqjen”, tha Meta.
Skema e manipulimit të botimit të aktit të KED në Fletoren Zyrtare që presidenti Meta po sqaron:
“Presidenti i Republikës ka 2 vite e gjysmë se Gjykata Kushtetuese po bllokohet qëllimisht. Pse doli Dvorani? Se u eleminuan anetarët e Gjykatës së Lartë. Manipulimet. Në 21 shtator bëhet mbledhja e Komisionet të Emërimeve në Drejtësi. Vakanca e parë e presidentit, e dyta e parlamentit, e treta e presidentit e katërta e parlamentit, që miratohen në një ditë. Keto të katërta u miratuan në një ditë nga KLD, sipas radhës. Në fund fare mori vendimin që do botohej në Gjykatën e Lartë. Kemi publikimin e paligjshëm në Fletoren Zyrtare. Ai vendim publikohet në mënyrë të paligjshme. Këtu botohet dekreti i presidentit. Manipulimi, falsifikimi qëndron se është miratuar për shtetin e propagandës”, tha Meta.
TIRANA TODAY
