Kryetari i Partisë së Lirisë, Ilir Meta, ka zbuluar mbrëmjen e djeshme në emisionin “Opinion” se Sigurimi i Shtetit ka dashur ta bëjë bashkëpunëtor, por ka dështuar. Meta deklaroi se Sigurimi i Shtetit ka futur provokatorë, dhe ka dështuar (në atë kohë). Ndër të tjera shtoi se nuk ka pranuar të bëhet anëtar i Partisë të Punës.
“Unë kisha një Ilir Metaj tjetër në klasë, e kishte shtëpinë tek “Hoxha Tahsim”, unë e kisha te “Pazari i Ri”. Babai i tij ishte drejtor i Sigurimit të Shtetit të Tiranës. Ai vinte te shtëpia ime, sepse bënim edhe ushtrime bashkë, edhe unë shkoja te shtëpia e tij.
Sigurimi ka dashur të më bëjë dhe bashkëpunëtor, kjo gjë nuk ka ndodhur. Sigurimi i Shtetit ka futur provokatorë dhe ka dështuar (në atë kohë). Unë nuk kam pranuar të bëhem as anëtar i Partisë të Punës. E gjithë kjo përpjekje për të hapur një diskurs të tillë, duke patur në konsideratë një histori që unë ia kam treguar ndonjë ish-deputeti që unë ia kam treguar kur ka pasur halle në kohën e vet, në fillim të viteve 90-të. E gjitha kjo është trilluar si një histori ku shtohet një emër nga mbrapa personi”.
Ish-presidenti Ilir Meta, aktualisht kreu i Partisë së Lirisë është pyetur edhe për akuzat në SPAK për lobim. Meta tha se këto janë shpikje. Ai theksoi se nuk ka frikë nga asnjë vendim i SPAK.
Ilir Meta: Zoti Fevziu këto janë të gjitha shpikje, janë mashtrime, janë trillime.
Blendi Fevziu: Keni frikë nga një vendim i SPAK?
Ilir Meta: Nuk kam frikë nga vendim as i Zotit, sepse edhe ai po mori vendim është çështje e tij, jo më nga këto instrumente që po i përdorin dhe po i keqpërdor Edi Rama në mënyrë ordinere…
Blendi Fevziu: Cilat instrumente? Ju keni shkuar vetë në SPAK. Pse kur bëjnë hetime ndaj jush keqpërdoren dhe kur bëjnë hetime ndaj Ramës dhe njerëzve të tij, kryejnë detyrën.
Ilir Meta: Unë çoj kallëzimin për Autoritetin në SPAK dhe Prokurori. Prokuroria nuk bën asnjë veprim hetimor dhe as nuk e regjistron çështjen, ndërkohë që ne japim ngjarjet, faktet, dokumentet dhe si duhet proceduar për një çështje që është skandaloze sepse ka të bëjë me Kuvendin, ka të bëjë me kryetarin e një partie në opozitë, ish-president, pra ka një interes. Por as kallëzuesin nuk e thërret për të sjellë të dhëna të tjera shtesë. Kjo është drejtësia e Edi Ramës.
Meta mohoi që të ketë paguar para për një foto të parealizuar me ish-Presidentin e SHBA-së, Donald Trump.
Blendi Fevziu: A keni paguar për një foto të parealizuar me presidentin Trump?
Ilir Meta: Kurrë!
