Presidenti i Republikës, Ilir Meta tha sonte se nuk ka asnjë dijeni për “peshqit e mëdhenj”. I ftuar në emisionin “5 pyetjet nga Babaramo”, Presidenti theksoi se shqiptarët presin që sistemi i drejtësisë të funksionojë në mënyrë të pavarur dhe profesionale. I pyetur nëse ka dijeni për “peshqit e mëdhenj” që do arrestohen në janar, sipas paralajmërimeve të ambasadorit amerikan në Tiranë, Donald Lu, presidenti Ilir Meta ironizoi se nuk është shenja e ujorit”.
Meta u përgjigj përmes batutës se nuk i përket shenjës së ujorit që t’i dijë “peshqit e mëdhenj”. “Nuk kam asnjë dijeni. Të gjithë presin që ky sistem të funksionojë në mënyrë të pavarur dhe profesionale. Për më tepër që nuk jam shenja e ujorit“.
Gjithashtu Meta ka shtuar se nëse palët vazhdojnë në këtë rrugë për sa i përket reformave që ndikojnë në procesin e integrimit, atëherë edhe në qershor do të kemi një shans të djegur për hapjen e negociatave.
“Unë e di shumë mirë që nëse palët do të vazhdojnë në këtë rrugë Shqipëria do të ketë një shans të djegur në qershor. Kemi humbur shumë mundësi që nga 96 e në vijimësi. Duhet të ishim në një status tjetër tani. Le të na kthehen ato shans që të mos dështojmë pasi do të ishte një zhgënjim për të gjithë popullin”, tha Meta.
