Nënkryetari i Akademisë së Shkencave, Vasil Tole deklaron se ASH do i drejtohet me një kërkesë zyrtare Presidentit të Republikës, për të rishqyrtuar edhe një herë dekretin që refuzon emrin e Skënder Gjinushit si kryetar i këtij institucioni.
Pas përfundimit të mbledhjes së jashtëzakonshme të kësaj asambleje, Tole doli në një deklaratë për mediat ku edhe bëri të ditur vendimin e Akademisë me vetëm një votë kundër, atë të akademikut Artan Fuga.
“Vendimi i Asamblesë së Akademisë së Shkencave me pjesëmarrjen e 43 nga 44 akademikë është në fuqi dhe nuk ka pasur kundërshtim dhe as ankimim. Duke qenë se ky vendim është në fuqi, dhe duke shpresuar se ka ende hapësirë vendosëm t’i drejtohemi institucionit të Presidentit me një kërkesë për të rishqyrtuar dekretin e tij”, tha Tole.
Tole dha komentin e tij sa i përket argumentit të presidentit Meta, për papajtueshmëri të mandatit të Gjinushit për të drejtuar Akademinë e Shkencave. Tole u shpreh se e gjejnë të pavend këtë konstatim, teksa thekson se vendimi i Asamblesë është i pjekur, institucional dhe i pandikuar nga zhvillimet politike.
“Me ligjin e ri, parashikohen disa nene për situata të ngjashme, do veprohet sic citohet në ligj. Ka më në fund një procedurë se si veprohet. Nëse do ketë një dekret refuzimi parashikohet që lihet në dorë të Asamblesë. Nuk jemi në ngërc. Akademia e Shkencave është përpjekur që të provojë që jemi në gjendje të bëjmë reforma e të mbajmë në punë institucionin”, deklaroi Tole.
