Ish-Ministri i Drejtësisë, Ylli Manjani, ka sqaruar me anë të një postimi në Facebook nëse mund të shkarkohet Presidenti i Republikës, pas mosdekretimit të propozimit të Ramës për Ministër të Brendshëm të z. Sandër Lleshi. Për ti dhënë përgjigje kësaj pyetje, ai sjell në fokus nenin 90.2 të Kushtetutës.
Sipas këtij neni, Presidenti i Republikës shkarkohet nga Kuvendi kur;
-Ka kryer një krim të rëndë, ose ka shkelur rëndë Kushtetutën
-Votojnë jo më pak se 93 deputetë pro shkarkimit
-Vendimin e shkarkimit duhet ta vlerësojë Gjykata Kushtetuese
Meta nuk pranoi të dekretojë Sandër Lleshin për Ministër të Brendshëm në qeverinë e Ramës. Kërkesën për dekretim, Meta e mori që të premten e kaluar, por vetëm 5 orë para përfundimit të afatit kushtetues, zëdhënësi i Metës njoftoi përmes një mesazhi të shkurtër se “Presidenti Ilir Meta, nuk ka krijuar bindjen e plotë për t’i dhënë besimin kandidaturës së Sandër Lleshit si Ministër i Brendshëm”.
Ndonëse për shkarkimin e Fatmir Xhafës, Ilir Meta veproi shumë shpejt, për refuzimin e Sandër Lleshit ai respektoi afatin 7-ditor të përcaktuar nga Kushtetuta.
