Ish-kryetari i LSI-së, Ilir Meta ka akuzuar kryeministrin Rama se ka inskenuar shkarkimin e drejtorit të Spitalit në Berat dhe procedimin ndaj deputetit Rahovica atje për presion ndaj administratës.
Meta tha se policia e lidhur me drogën po kërcënon votuesit në Berat që të mos votojnë LSI-në. Ndër të tjera, Meta hodhi dyshime se Rama përdor substanca të ndaluara.
“Kush pi doping mendon se është më i fortë, por zgjedhjet do tregojnë tjetër rezultat , por kur t’i dalë dopingu do i kërkojë falje Petrit Vasilit. LSI e ka fuqinë tek rinia e Beratit dhe gjithë Shqipërisë. Rinia e ka vendosur forcë të parë”, tha Meta. Ai i bëri thirrje policisë të mos i bëjnë presion qytetarëve.
Meta i ktheu përgjigje edhe për çështjen e timonin Ramën. “Që të jesh timonier duhet të kesh aftësi të ndryshme. Duhet të dish të frenosh. Sa për akuzat e timonit, ai ka patur Nikon aty. Nëse ia ka lëvizur njeri timonin të merret me Niko Peleshin jo me ne”, tha Meta.
Nga takim i zhvilluar sot në Berat, ku janë prezantuar kandidatët për deputet, Meta tha se rritja e kësaj force politike, “solli një dashuri të paparashikuar, atë të Edit dhe Lulit”.
Tjetër gjë thoshin para dy javësh, tjetër gjë thonë tani. Basha thotë votat po s’na i dhatë ne, ja jepni Ramës. E Rama thotë po s’na i dhatë ne, jepjani Bashës. Kur ju të dy qenkeni bërë vëllezër pse të çojmë votat dëm ne, kur kemi një alternativë tjetër. Alternativën e LSI, që është alternativa e rinisë, alternativa kundër oligarkisë. Ta marrin me qetësi dhe dashuri, timoni iku. Tani të marrin një tepsi si timon, e të jenë të kënaqur sidoqoftë edhe me kaq” “, tha Meta.
