Presidenti Ilir Meta ka dhënë së fundmi një intervistë për “Al Jazeera”, ku ka komentuar situatën politike në vend, e kryesisht vendimin e tij për anulimin e zgjedhjeve vendore.
Gjatë intervistës, Meta theksoi se aftësia e vendit për të demonstruar që mund të zhvillojë zgjedhje të lira e të drejta është një nga pikat thelbësore për integrimin e Shqipërisë në BE.
“Nëse kriza vazhdon, shanset për t’iu bashkuar BE-së do të shtyhen me vite, jo vetëm me muaj. Kjo është e qartë. Nëse ne nuk tregojmë normalitet dhe progres lidhur me zgjedhjet e ardhshme lokale, atëherë kjo do jetë një katastrofë”, tha presidenti.
Më tej, Meta e mbron vendimin e tij për anulimin e zgjedhjeve teksa tha se mund të ndihmojë që të ulë palët në një tryezë politike:
“Jam i sigurt që kam bërë më të mirën për të shmangur këtë përshkallëzim të konfliktit mes qeverisë dhe opozitës dhe për t’u dhënë të dyja palëve mundësinë për t’u qetësuar, për të reflektuar dhe për të hyrë së shpejti në zgjedhje në të mirë të interesit të shqiptarëve”./ Tirana Today
