Presidenti Ilir Meta është takuar ditën e sotme me Komisioneren Europiane për Çështjet e Brendshme, znj. Ylva Johansson.
Në një postim në rrjetet sociale, Kreu i Shtetit ka zbardhur një pjesë të diskutimit me Johansson teksa e ka falënderuar për mbështetjen e gjithanshme, që BE i jep vendit.
Meta tha se pas 25 prillit, krimi i organizuar do të marrë goditje të prerë dhe Shqipëria do të kthehet në shinat e shtetit ligjor dhe të respektimit të plotë të të drejtave të njeriut.
Postimi i Presidentit Meta në rrjetin social, Facebook
“Kënaqësi të takohesha sot me Komisioneren Europiane për Çështjet e Brendshme, znj. Ylva Johansson. Një bashkëbisedim i hapur dhe i frytshëm mbi sfidat urgjente të rrugës europiane të Shqipërisë.
E falenderova për mbështetjen e gjithanshme, që BE i jep vendit tonë, përfshirë parandalimin dhe menaxhimin e emigracionit të paligjshëm përmes bashkëpunimit me FRONTEX.
Theksova rëndësinë, që do të ketë zhvillimi i zgjedhjeve të lira dhe të ndershme për rrugën europiane të Shqipërisë.
Pas zgjedhjeve të 25 prillit 2021, krimi i organizuar do të marrë goditje të prerë dhe Shqipëria do të kthehet në shinat e shtetit ligjor dhe të respektimit të plotë të të drejtave të njeriut.”
