Ilir Meta ka treguar prapaskenat e përplasjes politike me kryeministrin Edi Rama dhe përpjekjet e këtij të fundit për ta nxjerrë në opozitë. Ai theksoi në emisionin opinion se Rama ka tentuar shumë herë që të blejë deputetët e tij për ta nxjerrë LSI-në në opozitë. Sipas Metës, Rama përdori deputetin e Vlorës Shkëlqim Selami, tashmë i përjashtuar nga radhët e LSI-së, si sekser në mënyrë që të blinte deputetët e tij dhe të vijonte të qeveriste pa LSI-në.
Për këtë arsye, Meta tha se koalicioni nuk merr as notën katër, duke shprehur mosmarrëveshjet e thella midis tyre.
“Koalicioni nuk kalon as klasën. Nuk merr as notën 4, për dy vitet fundit. Rama fitoi Bashkinë e Tiranës në 2008 me ndihmën e LSI-së. Rama bëri marrëveshjen me Berishën në 2008 për eliminimin e LSI-së. Në vitin 2009 ishim të detyruar që të bënin një marrëveshje me PD-në për të mirë të vendit. Në 2013 bëmë sërish një marrëveshje me Ramën kur ai betohej se nuk do ti sillte më të këqija LSI-së. Unë nuk kam penguar timonin e qeverisjes së Ramës. Ai në timon ka pasur Niko Peleshin, nuk më ka pasur mua. Gabimi im është që nuk kam qenë në qeverisje dhe kam besuar tek fjala e Ramës që nuk do të bëjë gjera kundër LSI-së. E kam ftuar Ramën. Rama është ai që ka marrë Metën peng duke i bërë presion më një deputet të LSI-së në Vlorë. Rama e përdorte si sekser midis deputetëve të LSI-së për të plotësuar numrin 71 të deputetëve dhe të vijonte të qeveriste pa mua dhe LSI-në. Mund t’ju përmend edhe rastin kur deputeti Parid Cara më erdhi në zyrë dhe donte të kalonte me LSI-në i thashë, “ti mund të kesh të drejtë që do të kalosh me LSI-në, por nuk mund ta bësh këtë gjë.” Më pas i thashë Ramës, “merri deputetët, ruaji me qetësi dhe mbaji nën kontroll.” Kjo është ajo që më dallon mua nga Edi Rama”, u shpreh Meta.
