Presidenti i zgjedhur, Ilir Meta në takimin me simpatizantët e LSI-së në Fushë-Krujë, ka hedhur akuza të ashpra ndaj kryeministrit Edi Rama dhe kryetarit të grupit parlamentar të PS-së, Gramoz Ruçit. Meta në fjalën e tij tha se këta të dy i njeh shumë mirë edhe se sa trima janë. Meta tha se Ruçi u arratis në vitin 1996 për në Greqi, veshur me fustane grash.
“Nuk vë dot dorë ai mbi të drejtat e të rejave dhe rinjve të Shqipërisë. As ai dhe as ai tjetri që u arratis në ’96 në Greqi, me fustan grash. E di mirë forcën e tyre unë, trimërinë e tyre. Fati i Janukoviçit të Ukrainës do u duket lule, sepse edhe nëse ka rënë kryetari i opozitës nuk bie rinia e Shqipërisë”, tha Meta.
Meta gjithashtu ironizoi më shprehjen e famshme që doli pas zgjedhjeve të vitit 2013, “1 milion shuplaka”, sot Meta tha se nesër Tirana do të nisë marshimin për të vajtur në 1 milionë grushte.
“Nesër Tirana nis marshimin për të vajtur në 1 milionë grushte. Unë e kam mbajtur fjalën gjithmonë edhe pse nga ju është konvertuar pabesisht për shkak të korrupsionit në Rilindas. Nuk është faji i Metës nëse dikush e shet fjalën për tendera“, tha Ilir Meta.
