Nesër përfundon afati kushtetues që presidenti Meta ka për të dekretuar të propozuarin nga kryeministri Rama, për postin e Ministrit të Brendshëm. Deri më tani, Meta ka firmosur shkarkimin e Fatmir Xhafaj, por ende nuk është shprehur me dekret për Sandër Lleshin.
Neni 93 i Kushtetutës nuk i lë hapësirë presidentit për një rrëzim të propozimit të kryeministrit, pasi përcakton vetëm afatin 7 ditor që kreu i shtetit ka për të dekretuar emërimin apo shkarkimin e ministrit.
Burime nga presidenca janë shprehur se Meta është në pritje të përgjigjes së institucioneve, që provojnë pastërtinë e figurës së ministrit të propozuar, apo ndonjë konflikti të mundshëm interesi me kriteret që përcaktohen në nenin 103 të Kushtetutës.
Pak ditë më parë, në studion e emisionit “Opinion”, ai tha se kreu i qeverisë i ka vënë detyra të qarta.
“Edi Rama më ka dhënë një letër me 10 pika. Nuk do t’jua tregoj atë letër, por aty ka autoritet dhe pushtet të pakufizuar për punën time. Nuk kam asnjë kufizim. Nëse do ketë sukses, do të jetë i një stafi të madh, por nëse do të ketë dështim, ai do të jetë imi. Nuk ka lidhje kryeministri me këtë. Kohën e ardhshme do ta heq nga fjalori im. Nuk do të vij në studio, këtu apo diku tjetër dhe të them: “Do bëjmë këtë, apo do bëjmë atë”, tha ministri i ardhshëm.
