Informacioni sekret i pretenduar nga kreu i shtetit, Ilir Meta, për tentativën për djegien e Kuvendit më 8 qershor, ka shkuar në duart e drejtuesit të Komisionit Hetimor, Ulsi Manja. Gjatë seancës së sotme, Manja konfirmoi se materiali i është vënë në dispozicion nga Presidenca, dhe deputetët e Komisionit do të njihen nëse kanë nivelin e duhur të certifikatës së sigurisë.
“Më 13 shtator ka përfunduar proceduara e plotë e vënies në dispozicion të këtij materiali nga ana e Presidentit, dhe që do të jetë pjesë e dokumentacionit që kolegët e Komisionit, në përputhje me ligjin me “informacionin e klasifikuar shtetëror”, do të njihen dhe do të bëhen pjesë e diskutimit të seancës ku do të shqyrtojmë dokumentet e institucioneve”, deklaroi Manja.
Në seancën ku u pyet përpara deputetëve, Meta tha se shfuqizimi i 30 qershorit si datë për zgjedhjet lokale u mor pas informacionit se një grup i caktuar, kishte planifikuar të shfrytëzonte protestën e opozitës, më 8 qershor, për të djegur Parlamentin.
