Kryetari i Kuvendit dhe Presidenti i Zgjedhur, Ilir Meta nga qyteti i Beratit tha se më 25 qershor shqiptarët do të zgjedhin LSI-në si forca që mbron interesat e qytetarëve.
Meta i ka bërë thirrje drejtorit të policisë së shtetit që të mos marrë porosi për të bërë presione tek votuesit, pasi nuk do të ketë asnjë mëshirë.
“I bëj thirrje drejtorit të policisë së shtetit këtu dhe atyre që kanë marrë porosi për të shkrirë LSI, thirrini mendjes dhe mos merrni porosi nga një njeri që jo vetëm policia po as mjekësia nuk i bën dot derman. Nuk do të ketë asnjë amnisti, asnjë keqardhje, asnjë mëshirë për çdo drejtues policie dhe për çdo bandit që do guxojë të bëjë presion qytetarëve të Beratit dhe Shqipërisë për votën e lirë”-Tha Meta.
Ai u shpreh se më 25 qershor do të nis Vettingu popullor më votë kundër bandave të rilindjes.
“Në 25 qershor, siç e patë dje në Kavajë, edhe Kavaja do ti shporr përmes Vettingut popullor bandat e rilindjes, jo më Berati. Ndaj asnjë shpresë të mos ketë lideri i mavisë, Berati është dhe do të jetë i kuq, flakë fare. Berati nuk i harron mashtrimet. Berati u jep fjalën burrave të besës dhe të fjalëve”,- tha Ilir Meta.
Kreu i Kuvendit paralajmëroi dhe personat që kanë kryer incidente dhe kanë ushtruar presion dhe dhunë ndaj militantëve të Lëvizjes Socialiste për Integrim. Meta tha se nuk do të ketë asnjë mëshirë ligjore ndaj kujtdo që prek votat dhe që dhunon qytetarët.
Ilir Meta deklaroi se Edi Rama i mban kot shpresat tek Lulzim Basha apo tek Policia për një rezultat të mirë në zgjedhje. “Kot i mban shpresat te bluja kryetari i mavisë, qofte te “Lulushi”, qofte te Policia. S’i bën derman as marrëveshja e errësirës me “Lulushin” as policia te cilës i beri thirrje pak dite me pare te bëjnë fushate për votat për PS.” – deklaroi Meta.
Meta thumboi Ramën, duke thënë se as mjekësia nuk i bën dot derman. “Mos merrni porosi nga një njeri, që jo vetëm policia, por as mjekësia nuk i bën dot derman. Nuk do të ketë asnjë amnisti, asnjë keqardhje, asnjë mëshirë për çdo drejtues policie ose bandit, që do t’i bëjë presion qytetarëve për votën e lirë.” – deklaroi Ilir Meta në takimin përmbyllës të fushatës në Berat.
