Pas votimit të Bundestagut pro Shqipërisë për çeljen e negociatave me BE, ka ardhur edhe reagimi i presidentit Meta. Në një status në Facebook, Meta ka falenderuar parlamentin gjerman për angazhimin dhe mbështetjen e integrimit të Shqipërisë. Po kështu ai ka apeluar që të punohet për zgjidhjen e krizës politike, dhe plotësimin e 9 kushteve.
Statusi
Falenderim i veçantë Bundestagut, veçanërisht grupit CDU-CSU për angazhimin e tyre serioz në mbështetje të integrimit të Shqipërisë!
Tani urgjent të punohet për zgjidhjen e shpejtë të krizës së rëndë politike, dhe plotësimin e 9 kritereve të qarta!
Po të ishin dëgjuar këshillat e tyre në kohë, sot do të kishim marrë një vendim pa kushte ashtu si Maqedonia e Veriut. Reflektim serioz për t’i dhënë Shqipërisë një mundësi reale, jo imagjinare!
Urime Maqedonisë së Veriut!”, shkruan Meta.
Me 395 vota pro dhe 16 abstenim, Gjermania i thotë ‘PO’ Shqipërisë për çeljen e negociatave me BE. Ambasadori i BE në Tiranë, Luigi Soreca, ishte i pari në “Twitter” që njoftoi se Bundestagu gjerman ka votuar në favor të hapjes së negociatave me Shqipërinë dhe Maqedoninë e Veriut.
“Bundestagu gjerman ka votuar këtë mbrëmje në favor të hapjes së negociatave me Shqipërinë dhe Maqedoninë e Veriut në tetor”, shkruan Soreca.
