Në tre shkolla të Kamzës “Nënë Tereza”, “Demokracia” dhe “Korb Muça” mësueset e klasave të para dhe një mësues i klasës së pestë, kanë përcaktuar në listën që ju kanë dhënë nxënësve edhe librarinë ku duhet t’i blejnë mjetet mësimore, e cila quhet librari “Fabler” në Kamëz.
Bashkëpunëtorët e Fiksit takuan njërën prej mësueseve të klasave të para në shkollën 9-vjeçare “Nënë Tereza” zj. Liljana Prendi, e cila ju tregoi bashkëpunëtorëve ku ndodhej libraria, dhe se vetë ajo ju kishte dhënë një rekomandim nxënësve që t’i blinin mjetet aty.
Ajo u tregon bashkëpunëtorëve të Fiksit se fletoret që merren aty janë dhe me ofertë.
Pas kësaj verifikimi vazhdoi edhe në librarinë që të orientonin mësueset, ku pyetën për çmimin e mjeteve që ishin shkruar në listë, ku në total kapte shifrën prej 45 mijë lekë të vjetra.
Ndërkohë që në një librari tjetër vetëm pak metra më tutje e njëjta listë shkonte deri në 20 mijë lekë të vjetra.
Pas këtyre fakteve gazetarët e Fiksit shkuan në të treja shkollat, drejtuesit e të cilave përgjigjen të gjithë në të njëjtën mënyrë, duke marrë përsipër që mësuesit t’i nxjerrin para këshillit të disiplinës për të marrë masa për ta.
Mësuesja e klasës së parë në shkollën 9-vjeçare “Demokracia” Vjollca Nazeraj pranoi se ka shpërndarë një listë ku përcaktohej dhe libraria por sipas saj, listën ja dha një kolege.
Debati mes saj dhe drejtorit të shkollës u bë në prezencën e gazetarëve, ku drejtori i thoshte se ke bërë shumë gabim që ke shpërndarë listë, e ndërkohë mësuesja mbrohej me idenë se nuk e dinte se po bënte gabim.
Në shkollën 9-vjeçare “Korb Muca”, mësuesi i klasës së pestë që ka shpërndarë listën e mjeteve me librarinë e përcaktuar, mohoi ta ketë bërë këtë gjë, ndërkohë drejtori i shkollës tha se do e verifikonte dhe nëse kjo gjë ka ndodhur do të mblidhet menjëherë këshilli i disiplinës.
Drejtori i shkollës 9-vjeçare “Nënë Tereza”, shkollë në të cilën dy mësueset e klasave të para kishin shpërndarë listat, tha për Fiksin se kjo është absolutisht shkelje dhe se kjo gjë nuk duhet të ndodhë.
Ai tha se do ngrejë menjëherë këshillin e disiplinës për rastin dhe do merret masë. /Top Channel
