Lionel Messi padyshim është një ndër futbollistët më të talentuar që ka njohur futbolli i të gjitha kohërave, por edhe ai ka një defekt. Ylli argjentinas ka fituar pothuajse gjithçka në karrierën e tij me klubin e Barcelonës, por në kombëtare nuk është po aq i suksesshëm. Marrëdhënien me golin Messi e ka perfekte, por kur vjen puna tek penalltitë shpeshherë ka zhgënjyer, edhe pse është i vetëm përballë portierit. Ai ka goditur gjithsej 88 penallti, nga të cilat ka shënuar vetëm 71, pra janë plot 17 penallti të humbura dhe disa në ndeshje të rëndësishme.
“Penalltitë. Dua të jem më rezultativ”, ka thënë fillimisht Leo Messi për “Catalunya Radio”. “Pleshti” ka treguar se është vështirë të përmirësohet te penalltitë, pasi është e pamundur të praktikosh një skenar ndeshjeje në stërvitje.
“Është shumë e vështirë. Nuk mund t’i praktikosh në stërvitje pasi në ndeshje situata është ndryshe. Ka shumë faktorë që hyjnë në lojë. Mund të kesh një plan ose një ide, por kur vjen momenti bëhet shumë më e vështirë sesa duket”, ka përfunduar Messi.
