Lionel Messi ka filluar që të mos durojë më zërat dhe lajmet e pavërteta që shpërndahen rreth tij. Argjentinasi ka zgjedhur që të përgënjeshtrojë vetë disa prej tyre nëpërmjet një postimi në rrjetet sociale.
Dy zërat e fundit ishin ata që shihnin atë pranë Inter dhe si një prej bamirësve që ndihmuan Ronaldinho të dalë nga burgu në Paraguaj. Nëpërmjet një postimi në rrjetet sociale, ka qenë vetë Messi që ka bërë të ditur se lajmet e raportuara nga “TNT” ishin “fake news”.
Ai kishte shkruar “Gënjeshtra numër 1” dhe “gënjeshtra numër 2” mbi postimet e rrjetit televiziv argjentinas për të dy lajmet në fjalë. “Ajo që thonë në këtë media rreth ofertës së Newell’s Old Boys prej një jave është gjithashtu e pavërtetë. Sa mirë që nuk u beson askush…”, ishin fjalët e Messi, i cili me sa duket ka vendosur që tani e tutje të dalë në mbrojtje të imazhit të tij sa u përket lajmeve të rreme që qarkullojnë.
