Në mesnatë u zhvillua mesha për Pashkët Katolike në Tiranë, Shkodër, Lezhë dhe qytete të tjera. Ndryshe nga herët e tjera, për shkak të situatës nga koronavirusi vdekjeprurës, katedralet ishin bosh.
Meshën në Katedralen e “Shën Palit” në Tiranë e drejtoi Imzot George Frendo. Gjithçka u mbajt online, pasi prezent nuk ishte asnjë qytetar, duke respektuar rregullat për pandeminë.
Imzot George Frendo u shpreh se nata e 12 prillit i kujtonte vitin 1997, por theksoi se të gjitha sakrificat do të shpërblehen.
“Ndërsa zakonisht ju takoj në këtë kishë katedrale, sonte nëpërmjet televizorit. Çdo vit kremtojmë festën e Pashkëve, por në një situatë të ndryshme. Më kujtohet kur kam kremtuar pashkët për herë të parë në Shqipëri, marsi i 1997, gjatë kremtimit kam parë disa besimtarë duke qarë. Por unë kujtova fjalët e Jezusit, që ai tha pak orë para se ushtarët ta kapnin për ta çuar drejt kryqit u tha apostujve, ju do të hidhëroheni, por hidhërimi juaj do të kthehet në gëzim. Kur gruaja është duke lindur hidhërohet, se i erdhi ora e lindjeve, por kur lind foshnja, ajo e harron vuajtjen nga gëzimi se ka sjellë një njeri në botë. Sot po bëjmë shumë sakrifica, por le të hedhim me shpresë një shikim drejt një të ardhmeje që do të kurorëzojë të gjitha sakrificat që po bëjmë këto ditë”, tha ai.
