Gjykata e Shkallës së Parë në Tiranë ka vendosur masën “arrest me burg” për Ervis Martinajn dhe Eljon Haten. Të dy këta të fundit ndodhen në spital, mes tyre Hate në gjendje kritike për jetën.
Pavarësisht pretendimeve të avokatëve të të plagosurve, se nuk kanë lidhje me konfliktin në fjalë, gjykata ka dhënë për ta masën “arrest me burg” për 30 ditë.
Dje Prokuroria mori në pyetje në spital biznesmenin e basteve Ervis Martinajn për të hedhur më shumë dritë mbi ngjarjen. Martinaj mohoi të kishte lidhje me konfliktin në fjalë. Ai dëshmoi se sherri ka nisur mes Mevjol Bolit dhe Fabian Gaxhës, viktimë nga përplasja e 4 tetorit.
Dyshohet se ‘mollë sherri’ për konfliktin mes 7 personave ka qenë ngacmimi i këngëtares Elvana Gjata, që ndodhej në lokal bashkë me të dashurin e saj, Ervin Mata.
Ky i fundit është shpallur në kërkim bashkë me komandon Mevjol Boli.
