Nënkryetari i Rithemelimit, Luçiano Boçi, ka kandiduar sot për Bashkinë e Elbasanit, duke hequr dorë nga mandati i deputetit. Boçi u shpreh se si zëvendësues i tij në Parlament do të jetë Qani Xhafa.
Dakordësia e grupit të Alibeajt për kandidaturën e Boçit vjen në një kohë kur PD-ja dhe Rithemelimi nuk kanë arritur konsensus për të shkuar në zgjedhjet e 14 majit me kandidat të përbashkët. Ndërkohë, ditën e djeshme është mbyllur afati për marrjen e propozimeve dhe kandidimeve në Primaret e Berishës.
Qani Xhafa është demokrati që pritet të zërë në Parlament vendin e Luçiano Boçit, në rast se ai shpallet fitues në Primaret e PD për Bashkinë e Elbasanit.
Ai ka folur për “News 24” për herë të parë pas shpalljes së kandidaturës nga ana e Boçit, duke theksuar se të zëvendësosh atë është një përgjegjësi e shumëfishtë, duke e konsideruar Boçin personalitet të rëndësishëm.
“Së pari uroj që bashkimi i të gjithë demokratëve të jetë sa më i shpejtë. Do jem përfaqësues dinjitoz i Qarkut të Elbasanit në Parlament, dhe do mbështes fuqishëm kandidatin për kryebashkiak të Elbasanit, Luçiano Boçi. Shpresoj se do ndodhë më e mira për të djathtën, në të ardhmen. Jam demokrat i orëve të para dhe rrugëtimi im në politikë ka qenë i mbushur plot vështirësi, por edhe me suksese.
Jam i bindur që edhe në këtë etapë të re të zhvillimeve politike te PD, sukseset nuk do mungojnë duke filluar së pari me bashkimin e shumëpritur dhe me fitoren e zgjedhjeve vendore. Është mandati që PD e meritonte që në 25 Prill. Të zëvendësosh Boçin është përgjegjësi e shumëfishtë. Ai është personalitet mjaft i rëndësishëm, jo vetëm i PD, por i politikës shqiptare”, tha Xhafa.
