Merr fund dhe ‘telenovela’ e mesfushorit rus që shpërtheu gjatë Botërorit, Aleksander Golovin. Paraqitjet e tij të mira bënë që shumë skuadra të njohura evropiane të vihen pas tij për ta transferuar. Fillimisht u fol për një interesim të fortë të Juventusit dhe se pritej që të bëhej zyrtare, por nuk ndodhi.
Por merkato për talentin rus mori një rrjedhë tjetër dhe ai iu bashkua francezëve të Monacos. Klubi francez ka njoftuar se ka nënshkruar me Golovinin nga CSKA Moskow një kontratë pesëvjeçare.
“AS Monaco është shumë e lumtur të ju njoftoj se ka nënshkruar me Aleksandr Golovin nga CSKA Moskow për pesë vite, deri në qershor 2023”, thuhet në njoftimin e francezëve. Mendohet se në këtë transferim ka ndikuar edhe pronari i ekipi francez që është një manjat rus.
Çmimi i transferimit nuk është zbuluar nga asnjëra skuadër, por mendohet të jetë rreth 25 milionë euro. Në garë për mesfushorin rus ishin edhe anglezët e Chelseat dhe italianët e Juventusit.
