Gazetari i njohur Mero Baze ka promovuar librin e tij të ri. Në mjediset e “Hotel Tirana” u promovua libri “Republika e Parë” e gazetarit Mero Baze, ku sjell në fokus ngjarjet politike të Kosoves në vitet ’90. Pjesmarrës në takim ishin diplomatë dhe gazetarë që janë njohës të zhvillimeve në Kosovë.
Shkrimtari Preç Zogaj, i cili ka bërë edhe parathënien e librit, e cilësoi “Republikën e Parë”, një dëshmi e nivelit të lartë, që ka vlerë më të madhe për të ardhmen.
Zogaj, tha se “Republikën e Parë” e Mero Bazes mund ta quajmë një vepër historike dhe publiçistike të karakterit madhor.
Sipas Zogajt, trajtimi me kaq seriozitet dhe me kaq kujdes i një periudhe të pahulumtuar siç duhet është një konribut tepër madhor për historinë e Kosovës dhe shqiptarëve.
E pikërisht tek vizioni i lëvizjes që drejtoi Ibrahim Rugova dhe Bujar Bukoshi, u ndal Mero Baze në fjalën e tij. Sipas tij, ka disa dimensione që sot mund ta shikojmë më qartë të asaj lëvizje.
Por më kryesorja është se LDK-ja i dha fund një procesi tashmë shekullor, kur serbët zgjidhnin apo ndikonin për të zgjedhur përfaqësuesit politikë të shqiptarëve.
Ndërkaq, Baze shtoi se përmbajtja e vizionit politik që solli “Republika e Parë” e Ibrahim Rugovës ishte fitues që në fillim, pasi solli simpatinë e këtij vizioni nga Perëndimi, i cili betejat e Rugovës për demokraci dhe të drejta të njeriut, i konsideronte si vlera të tij.
