Është gruaja më e fuqishme në botë, mirëpo nuk është e dhënë pas luksit dhe markave të shtrenjta.
Bëhet fjalë për kancelaren gjermane Angela Merkel, e cila jo rrallëherë është vënë në fokus të mediave për shkak të jetës modeste që bën.
Merkel, përkundër të ardhurave nga pozita e rëndësishme që mban në shtetin gjerman, jeton në një banesë me qira në Berlin.
Ajo bashkë me burrin e saj prof. Dr. Joachim Sauer, jeton në një banesë në katin e 4-të në Am Kupfergraben 6, në “Muzeun e Ishullit”, në një hapësirë prej vetëm 80 metrash katrorë.
Por, një jetë e tillë, duket se nuk e kanë në qejf politikanët dhe zyrtarët shtetërorë në Kosovë. Edhe pse jetojnë dhe punojnë në shtetin më të varfër në Evropë, politikanët tonë, jetojnë mes luksit.
Vetë kryeministri i Kosovës Ramush Haradinaj, në formularët e deklarimit të pasurisë për vitin 2017, ka deklaruar patundshmëri në vlerë prej mbi 800 mijë euro.
Në deklarimin e pasurisë që ka bërë Haradinaj para se të ishte kryeministër në Agjencinë Antikorrupsion, shtëpinë e tij të re në “Marigona Residence” me 500 metra katrorë, ka thënë se e ka blerë me kredi në vitin 2016 e që i ka kushtuar 202 mijë euro, transmeton Botasot.
Ai poashtu e ka deklaruar një shtëpi banimi prej 950 metra katrorë, të cilën e ka të lëshuar me qira, që vlen 300 mijë euro, shtëpinë familjare-kulla që vlen 270 mijë euro, tokë kodrinore në vlerë prej 75 mijë euro, tokë-truall që vlen 27 mijë euro dhe shtëpi banimi që vlen 140 mijë euro.
