Kancelarja gjermane Angela Merkel u shpreh kundër ideve për ndryshimin e kufijve të jashtëm në Ballkanin Perëndimor. Gjermania mbështetë perspektivën evropiane të rajonit.
“Integriteti territorial i vendeve të Ballkanit Perëndimor është i përcaktuar dhe i paprekshëm. Kjo duhet të përsëritet gjithnjë, sepse ekzistojnë tendenca që çështje e kufijve të hapet prap. Kjo nuk mund të ndodhë. Duke u nisur nga ky fakt, ne jemi unik që vendeve të Ballkanit Perëndimor t’u jepet perspektiva e integrimeve evropiane”, deklaroi kancelarja gjermane Angela Merkel, pas takimin në Berlin me udhëheqësin e Këshillit të Ministrave të Bosnje-Hercegovinës, Denis Zvizdiq. Merkel tha se B-H po angazhohet që sa më parë të marrë statusin e kandidatit për anëtarësim në BE dhe se Gjermania do ta mbështetë këtë vend në këtë rrugë aspak të lehtë, ku kanë mbetur edhe shumë punë që duhet kryer.
Një moment tjetër në raport me B-H është edhe mundësia që ky vend të marrë statusin e kandidatit për anëtarësim në NATO. “Gjermania mendon se kjo mund të arrihet gjatë këtij viti”, theksoi Merkel në konferencën e përbashkët me Zvizdiq, pas takimit të tyre të mbajtur ditën e hënë në Berlin. Edhe Zvizdiq theksoi pas takimit se “ndryshimi i kufijve në Ballkanin Perëndimor ka përfunduar”.
Sa i përket rrugës së këtij vendi, Zvizdiq theksoi se “rruga evropiane nuk ka alternativë”. “Synimet më të rëndësishme të B-H janë anëtarësimi në BE dhe në NATO, që është e pamundur pa mbështetjen e Gjermanisë dhe Britanisë së Madhe. Kjo rrugë nuk ka alternativë tjetër dhe ne do të përpiqemi të përgjigjemi në të gjitha pyetjet e nevojshme, me qëllim që sa më parë të marrim statusin e kandidatit për anëtarësim në BE”, theksoi Zvizdiq.
Zvizdiq foli edhe për rolin e Turqisë në B-H. Ai tha se “Turqia kurrë nuk është përzier në punët e brendshme të B-H dhe nuk e ka penguar këtë vend në rrugën e integrimeve evropiane. Ndërsa kancelarja Merkel tha se “askush nuk është i interesuar që Turqia të destabilizohet ekonomikisht, por duhet bërë të gjitha që Banka Qendrore e Turqisë të mbetet e pavarur”. „Gjermania dëshiron prosperitetin ekonomik të Turqisë. Kjo është në interesin tonë”, theksoi Merkel. (Burimi:DW)
