Era e keqe e gojës është mjaft e sikletshme për secilin prej nesh. Edhe nëse i lajmë dhëmbët rregullisht, ndodh që goja të mbajë erë të keqe, për shkak të ushqimit të mbetur në dhëmbë, i cili nëse nuk pastrohet me fillin dentar, konvertohet menjëherë në baktere.
Por, çfarë duhet të bëjmë që t’i shpëtojmë këtij problemi? Sugjerohet që dhëmbët t’i lani çdo darkë. Kjo pasi ushqimi i mbetur në gojë gjatë natës shkakton një erë të keqe në mëngjes, por nëse i lani dhëmbët në darkë, kjo nuk do të ndodhë.
Gjithashtu, mos harroni të lani edhe gjuhën, pasi bakteret akumulohen edhe në gjuhë, duke shkaktuar një erë të fortë.
Një tjetër zgjidhje është që të pini shumë ujë, pasi në momentin që goja është e thatë, prodhohet më pak pështymë dhe si pasojë ushqimi dhe bakteret qëndrojnë më gjatë në gojë.
Tharja e gojës, përveç etjes shkaktohet edhe nga faktorë të tjerë. Të tillë janë kafja, alkooli, duhanpirja, madje edhe disa ilaçe.
Nëse keni erë të keqe nga goja, pavarësisht se përdorni gjatë gjithë kohës larës goje, që në të shumtën e rasteve vetëm sa e kamuflon për momentin atë, duhet të bëni një kontroll te dentisti.
