Zbardhen detaje të reja tronditëse në lidhje me vrasjen e 20-vjeçares britanike Caroline në Greqi, nga bashkëshorti i saj, Charalambos Anagnostopoulos.
Sipas portalit grek Newsbomb.gr, piloti 32-vjeçar ka shprehur pendim për vrasjen, duke thënë se i vjen keq pasi lëndoi shumë njerëz. Teksa jepte dëshminë e tij, Anagnostopoulos ka dhënë detaje të rënda në lidhje me vrasjen e Caroline.
Ai mbyti 20-vjeçaren me jastëk, por më pas u shpreh se u përpoq që ta kthente atë në jetë, por sipas tij në atë kohë ajo kishte vdekur. Anagnostopulos gjithashtu ka thënë se mendoi fillimisht që ta zhdukte kufomën e saj, por më pas i erdhi ida e grabitjes.
” Më vjen keq për njerëzit që lëndova. E di që ka shumë pak vlerë për ata që u privuan nga ajo. Ajo që bëra nuk është e justifikuar. Sjellja e saj ndryshoi me lindjen e fëmijës. Ajo u bë agresive . “Jo, mos e sillni të voglën, nuk e dua”. Unë i thashë asaj që fëmija duhet të ngjitet lart dhe të flejë. Caroline vazhdonte të dridhej, unë e mbajta gjithnjë e më fort sepse doja ta bëja atë të më dëgjonte. Fytyra e saj në jastëk po dridhej. Vazhdova ta mbaja fort në krahë derisa kuptova që Caroline kishte ndaluar së lëvizuri. E humba. U përpoqa ta zgjoja, po e tundja. Kot. Çfarë do të ndodhte me fëmijën tim? Mendova ta zhdukja kufomën e saj. Për ta bërë atë të besueshme, unë duhej ta lëndoja qenin. Askush nuk do ta mendonte se mund të dëmtoja një qen,“ tha ai.
Si tentoi 32-vjeçari të manipulonte vrasjen
Duke iu referuar dëshmisë së rreme të bashkëshortit të saj, tre persona, të cilët shkuan për të grabitur një shtëpi në Greqi, përfunduan duke vrarë 20-vjeçaren britanike, qenin e familjes dhe duke torturuar edhe vetë atë. 20-vjeçarja u gjet e vrarë në papafingo të shtëpisë, pranë krevatit të fëmijës së saj 11 muajsh, ndërsa burri i saj 32-vjeç, kishte krijuar një skenë sikur ishte i lidhur në një karrige në dhomën e gjumit. Ishte ai që njoftoi policinë duke i rënë telefonit me hundë (sipas tij), por bashkëshortja kishte ndërruar jetë prej kohësh.
Caroline u vra në të gdhirë të 11 majit. Bashkëshorti i së ndjerës tha se tre autorë të maskuar thyen një dritare të shtëpisë së tyre, dhe hynë brenda ku po flinin çifti dhe foshnja e tyre 11 muajshe. Ata lidhën 32-vjeçarin, ndërsa në përpjekjen për të neutralizuar 20-vjeçaren që po rezistonte, e mbytën. Sipas 32-vjeçarit, autorët e krimit kanë marrë 15.000 euro që ishin në një kuti. Dyshimet u shtuan për policinë, pasi autorët nuk kishin lënë asnjë gjurmë dhe as nuk morën celularët e çiftit.
