Ledian Memushaj ishte fantastik në përmbysjen e madhe që Pescara bëri një natë më parë në përballjen me Palermon. Edhe pse ekipi i shqiptarit ishte në humbje, në fund të takimit arriti të përmbyste gjithçka në 3-2 dhe të vazhdojë luftën për një vend në Serie A.
Kur Pescara gjendej në disavantazh 1-2, për të rikthyer baraspeshën mendoi Memushaj, i cili shënoi një gol fantastik nga jashtë zone. Vlonjati shfaqi të gjithë talentin e tij në minutën e 69’, kur bën një marrje fantastike të topin dhe lëshon një goditje perfekte duke e lënë në vend portierin e Palermos.
Në përfundimin e ndeshjes, Memushaj është treguar i sinqertë duke mos i mbajtur të gjithë meritat. Mesfushori vlonjat u shpreh se kishte pasur edhe një devijim nga lojtarët kundërshtarë, përpara se topi të përfundonte në rrjetë.
“Te goli kishte edhe një ndihmë të vogël nga kundërshtari, pasi u devijua pak topi. Por e rëndësishmja ishte fitorja dhe që u dha sinjali. Triumfuam në një moment delikat dhe gjetëm rrugën e duhur. Ky është një kampionat i fortë për të gjithë. Kemi një marrëdhënie të veçantë me tifozët dhe ata do të na ndihmojnë për të na rikthyer në elitën e Italisë”, ka thënë Memushaj.
