Kandidatja e dytë për postin e Prokurores të Përgjithshme, Fatjona Memçaj, po kryen seancën dëgjimore në Këshillin e Lartë të Prokurorisë. Memçaj gjatë fjalës së saj vuri theksin tek bashkëpunimi i thellë midis Prokurorit të Përgjithshëm dhe KLP-së. Fatjona Memçaj, përpara anëtarëve të KLP-së, tha se mbulojnë në vit 400 çështje, e ndësa më parë mbulonim mesatarisht 105 të tilla. Ajo shpjegoi se Prokuroria e Apelit ka mungesa, nuk ka oficerë të policisë gjyqësore. Më tej, duke vënë pikat mbi “i”, Memçaj citoi se Prokurori i Përgjithshëm duhet të shfaqë lidership. “Prokurori i Përgjithshëm ka disa raporte formale me institucionet shtetërore, si: raportimi përpara KLP-,së Parlamentit për të gjithë aktivitetin që kryen.
Marrëdhënien me KLP-në nuk e shoh thjesht formale, e shoh si bashkëpunim. Duhet që ai të trajtojë shqetësimin e një prokurori të Shkallës së Parë apo të Apelit. Ky bashkëpunim nuk duhet të jetë thjesht formal.
Është një detyrim kundrejt prokurorëve në Shkallën e Parë dhe në Apel, për të paraqitur shqetësimet. Jemi në periudhë zhvillimi, ku numri i prokurorëve është reduktuar. Mbulojmë 400 çështje në vit, më parë mbulonim mesatarisht 105 të tilla. Nuk jam e sigurt nëse e keni këtë informacion, prokuroria e Apelit ka mungesa, nuk ka oficerë të policisë gjyqësore. Mbingarkesa dhe rëndesa mbi aftësinë profesionale, do të cënojë veprimtarinë e prokurorëve. Marrëdhëniet institucionale duhet të tejkalojnë formalizmat. Më pëlqen që një gjë, të ulem e ta diskutoj e ta debatoj. Prokurori i Përgjithshëm duhet të shfaqë lidership, zgjidhjen mund ta gjejë me institucionet përkatëse. Të kryejmë detyrën, të sigurojmë prokurorët që të punojnë në kushtet e duhura. Llogaria vjen pasi të kemi kryer detyrën”, u shpreh Memçaj.
